စင်ဖတ် ကလေးဆေးရုံ၏ ကလေးအစာအိမ်နှင့် အသည်းရောဂါဗဟိုဌာန (Pediatric Gastroenterology and Hepatology Center)
ကလေးအစာအိမ်နှင့် အူလမ်းကြောင်းဆိုင်ရာ ကလေးအထူးကုဆရာဝန်ကြီးများက သင့်ရင်သွေးငယ်၏ အစာခြေစနစ်ကျန်းမာရေးကို ဘက်စုံစောင့်ရှောက်ပေးလျက်ရှိသည်။
ဗိုက်ပွခြင်း၊ ဂျီကျငိုယိုခြင်း၊ နို့မစို့ခြင်း၊ ဝမ်းသွားပုံမူမမှန်ခြင်း သို့မဟုတ် နာတာရှည် ဗိုက်နာခြင်းတို့သည် ကလေးအရွယ်တွင် ဖြစ်လေ့ရှိသော သာမန်ကိစ္စဟု ထင်ရသော်လည်း “ အစာခြေစနစ်” သည် ခန္ဓာကိုယ်အတွက် အာဟာရစုပ်ယူမှုနှင့် ကိုယ်ခံအားတည်ဆောက်မှုတွင် အဓိကအချက်အချာ ဖြစ်သည်။ ကလေး၏ အစာခြေစနစ်တွင် ပြဿနာရှိပါက ခန္ဓာကိုယ်ဖွံ့ဖြိုးမှု၊ ကြီးထွားမှုနှင့် ကျန်းမာရေးကို တိုက်ရိုက်ထိခိုက်စေနိုင်ပါသည်။
စင်ဖတ်ကလေးဆေးရုံသည် မိဘများ၏ စိုးရိမ်ပူပန်မှုများကို နားလည်ပြီး၊ ကလေးအစာအိမ်၊ အူလမ်းကြောင်းနှင့် အသည်းရောဂါဆိုင်ရာ ကလေးအထူးကုဆရာဝန်ကြီးများနှင့် ဆေးဘက်ဆိုင်ရာဝန်ထမ်းများက ခေတ်မီစက်ကိရိယာများဖြင့် ရောဂါအကြောင်းရင်းကို တိကျစွာ ကုသပေးကာ ကလေးငယ်များ လျင်မြန်စွာ ပြန်လည်ကောင်းမွန်ပြီး အသက်အရွယ်အလိုက် ကျန်းမာသန်စွမ်းစေရန် စောင့်ရှောက်ပေးလျက်ရှိသည်။
ဘယ်အချိန်မှာ ကလေးကို အစာအိမ်နှင့် အူလမ်းကြောင်း အထူးကုဆရာဝန်ဆီ ပြသသင့်သလဲ?
- မကြာခဏ ဗိုက်နာခြင်း၊ နာတာရှည် ဗိုက်နာခြင်း သို့မဟုတ် နေ့စဉ်လူမှုဘဝကို အနှောင့်အယှက်ဖြစ်စေသည်အထိ ဗိုက်နာခြင်း
- မကြာခဏ အန်ခြင်း၊ အစားနည်းခြင်း
- အစာမျိုရခက်ခြင်း၊ မကြာခဏ သီးခြင်း
- ဝမ်းလျှောခြင်း သို့မဟုတ် ဝမ်းချုပ်ခြင်း ၂ ပတ်ထက် ပိုကြာနေခြင်း
- ဝမ်းထဲတွင် သွေး/ချွဲပါခြင်း သို့မဟုတ် ဝမ်းအရောင် ဖြူဖျော့နေခြင်း
- အသားဝါခြင်း၊ မျက်လုံးဝါခြင်း
ကုသပေးနေသော ရောဂါအုပ်စုများနှင့် ရောဂါရှာဖွေကုသမှု ဝန်ဆောင်မှုများ
ကျွန်ုပ်တို့သည် မွေးကင်းစကလေးမှသည် ကြီးပြင်းလာသော ကလေးအရွယ်အထိ အစာခြေစနစ်၊ အသည်းနှင့် သည်းခြေလမ်းကြောင်းဆိုင်ရာ မူမမှန်မှုများကို ကုသပေးလျက်ရှိသည်။
စင်တာတွင် ကုသပေးနေသော လက္ခဏာများနှင့် ရောဂါအုပ်စုများ
- မွေးကင်းစနှင့် လမ်းလျှောက်စအရွယ် ကလေးများ: ဗိုက်အောင့်၍ အငိုမတိတ်ခြင်း၊ လေပွခြင်း၊ လေခဏခဏလည်ခြင်း၊ နို့ပြန်အန်ခြင်း၊ အန်ထုတ်ခြင်း၊ နို့မစို့ခြင်းနှင့် ကလေးအစာခြေရည်ပြန်ဆန်တက်ခြင်း (GERD)။
- ကြီးပြင်းလာသော ကလေးအရွယ်များ: နာတာရှည်နှင့် ရုတ်တရက် ဗိုက်နာခြင်း၊ ဝမ်းသွားစဉ် စအိုနာခြင်း၊ အစာရေမျိုပြွန်ရောင်ခြင်း၊ အစာအိမ်ရောင်ခြင်း၊ အစာအိမ်အနာ၊ နာတာရှည်အူလမ်းကြောင်းရောင်ခြင်း (IBD)၊ ဂျုံဓာတ်မတည့်ရောဂါ (Celiac Disease) နှင့် အူလမ်းကြောင်းလှုပ်ရှားမှု မူမမှန်ခြင်း (IBS)။
- ဝမ်းသွားခြင်းဆိုင်ရာ ပြဿနာများ: နာတာရှည်ဝမ်းချုပ်ခြင်း၊ ဝမ်းမာခြင်း၊ ရုတ်တရက်နှင့် နာတာရှည် ဝမ်းလျှောခြင်း၊ ဝမ်းထဲသွေးပါခြင်း၊ ဝမ်းမထိန်းနိုင်ခြင်း။
- အသည်း၊ မုန့်ချိုအိတ်နှင့် သည်းခြေလမ်းကြောင်းရောဂါများ: အသားဝါ/မျက်လုံးဝါခြင်း၊ မွေးရာပါ သည်းခြေပြွန်ပိတ်ခြင်း၊ ကလေးအသည်းရောင်ခြင်း၊ ကလေးအသည်းအဆီဖုံးခြင်း၊ သည်းခြေအိတ်ရောဂါနှင့် မုန့်ချိုအိတ်ရောင်ခြင်း။
- အစားအသောက်နှင့် အာဟာရစုပ်ယူမှုဆိုင်ရာ ရောဂါများ: နွားနို့ဓာတ်မတည့်ခြင်း (CMPA)၊ အစားအစာဓာတ်မတည့်ခြင်း၊ အာဟာရစုပ်ယူမှု မူမမှန်ခြင်း၊ အာဟာရချို့တဲ့ခြင်း၊ ကိုယ်အလေးချိန်မပြည့်မီခြင်းနှင့် အစားဂျီးများခြင်း။
အထူးပြု ရောဂါရှာဖွေရေးနှင့် ကုသမှုဝန်ဆောင်မှုများ
- ကလေးအစာအိမ်နှင့် အူလမ်းကြောင်း အထူးကုဆရာဝန်မှ ရောဂါရာဇဝင်နှင့် ခန္ဓာကိုယ်ကို အသေးစိတ် စမ်းသပ်စစ်ဆေးခြင်း
- ဓာတ်မှန်ဆိုင်ရာ ရောဂါရှာဖွေခြင်း – ဝမ်းဗိုက်အာထရာဆောင်းရိုက်ခြင်းနှင့် အစာခြေစနစ် ဓာတ်မှန်ရိုက်ခြင်း
- ကလေးများအတွက် မှန်ပြောင်းကြည့်ရှုစစ်ဆေးခြင်း (Pediatric Endoscopy) – အပေါ်ပိုင်းအစာခြေစနစ် မှန်ပြောင်းကြည့်ခြင်း၊ အူမကြီးမှန်ပြောင်းကြည့်ခြင်း၊ အသားစယူစစ်ဆေးခြင်း (Biopsy) နှင့် H. pylori ပိုး စစ်ဆေးခြင်း
- အာဟာရစီမံချက်နှင့် အပြုအမူထိန်းကျောင်းခြင်း – အစားအစာဓာတ်မတည့်မှုနှင့် အာဟာရစုပ်ယူမှုကို စစ်ဆေးခြင်း၊ အာဟာရဆိုင်ရာ အကြံဉာဏ်ပေးခြင်း၊ အစားအသောက်အပြုအမူနှင့် ဝမ်းသွားအလေ့အထကို လေ့ကျင့်ပေးခြင်း၊ ကြီးထွားမှု၊ ကိုယ်အလေးချိန်နှင့် အရပ်အမောင်းကို စဉ်ဆက်မပြတ် စောင့်ကြည့်ခြင်း
ဘာကြောင့် စင်ဖတ်ကလေးဆေးရုံ၏ ကလေးအစာအိမ်ဗဟိုဌာနကို ရွေးချယ်သင့်သလဲ?
- ✓ ကျွမ်းကျင်ကလေးအထူးကုဆရာဝန်ကြီးများ: ကလေးအစာအိမ်၊ အူလမ်းကြောင်းနှင့် အသည်းရောဂါဆိုင်ရာ အထူးကုဆရာဝန်ကြီးများက တိုက်ရိုက်ကုသပေးသည်။
- ✓ ၂၄ နာရီပတ်လုံး စိတ်အေးချမ်းသာစွာ အားကိုးနိုင်ခြင်း: ညဉ့်နက်သန်းခေါင် အရေးပေါ်ဖြစ်ပါက နံနက်အထိ စောင့်ဆိုင်းရန်မလိုဘဲ ချက်ချင်းကုသပေးနိုင်သည်။
- ✓ ခေတ်မီရောဂါရှာဖွေရေးစက်ကိရိယာများ: အခြေခံစစ်ဆေးမှုများမှသည် ကလေးမှန်ပြောင်းကြည့်ရှုစစ်ဆေးခြင်းအထိ ရောဂါအကြောင်းရင်းကို တိကျစွာ ရှာဖွေပေးနိုင်သည်။
- ✓ ဘက်စုံစောင့်ရှောက်မှု: ဆေးဝါးဖြင့်ကုသရုံသာမက အာဟာရညှိပေးခြင်း၊ အပြုအမူလေ့ကျင့်ပေးခြင်းနှင့် ကလေး၏ ကြီးထွားမှုကို စဉ်ဆက်မပြတ် စောင့်ကြည့်ပေးသည်။
အမေးများသော မေးခွန်းများ (Q&A)
Q: မွေးကင်းစကလေးက နို့ခဏခဏ ပြန်အန်တယ်၊ ဗိုက်ပွတယ်၊ ညနေစောင်းရင် ငိုတယ်၊ ဒါ ပုံမှန်ပဲလား?
A: မွေးကင်းစကလေးများတွင် လေပွခြင်းနှင့် နို့အနည်းငယ်ပြန်အန်ခြင်းတို့ ဖြစ်တတ်ပါသည်။ သို့သော် ကလေးက အချိန်ကြာမြင့်စွာ အငိုမတိတ်ခြင်း၊ အရှိန်ဖြင့် ဝေါခနဲ အန်ထုတ်ခြင်း၊ ကိုယ်အလေးချိန်မတက်ခြင်း သို့မဟုတ် ဝမ်းထဲသွေး/ချွဲပါခြင်းများ ရှိပါက အစာခြေရည်ပြန်ဆန်တက်ခြင်း သို့မဟုတ် နွားနို့ပရိုတင်းဓာတ်မတည့်ခြင်း ရှိ၊ မရှိ စစ်ဆေးရန် အထူးကုဆရာဝန်နှင့် ပြသသင့်ပါသည်။
Q: ကလေး ဝမ်းချုပ်တယ်၊ ဝမ်းမသွားချင်ဘူး၊ ဝမ်းမာလို့ ငိုတယ်၊ ဘယ်လိုဖြေရှင်းရမလဲ?
A: ကနဦးအနေဖြင့် အမျှင်ဓာတ်ပါသော အစားအစာများ ကျွေးပါ၊ ရေများများတိုက်ပါ၊ အချိန်မှန် ဝမ်းထိုင်သည့် အလေ့အကျင့် ပြုလုပ်ပေးပါ။ မသက်သာပါက ဆရာဝန်မှ ကလေးအတွက် ဘေးကင်းသော ဝမ်းပျော့ဆေးများနှင့်အတူ ဝမ်းသွားသည့် အလေ့အကျင့်ကို လေ့ကျင့်ပေးပါလိမ့်မည်။
Q: ကလေးတွေ ချက်ပတ်လည်မှာ ခဏခဏ ဗိုက်နာတာ ဘာကြောင့်လဲ?
A: ကလေးများတွင် ဗိုက်နာခြင်းသည် အစာအိမ်ရောင်ခြင်း၊ အစာမကြေခြင်း၊ ဝမ်းချုပ်ခြင်း၊ စိတ်ဖိစီးမှု သို့မဟုတ် အူလမ်းကြောင်းလှုပ်ရှားမှု မူမမှန်ခြင်း စသည့် အကြောင်းရင်းများစွာကြောင့် ဖြစ်နိုင်ပါသည်။
Q: ကလေးတွေကို မှန်ပြောင်းကြည့်ရှုစစ်ဆေးတာ အန္တရာယ်ရှိပါသလား?
A: ကလေးမှန်ပြောင်းစစ်ဆေးခြင်းသည် ဘေးကင်းမှု အလွန်မြင့်မားသော စစ်ဆေးမှုဖြစ်ပါသည်။ ကလေးအစာအိမ်အထူးကုဆရာဝန်နှင့် မေ့ဆေးအထူးကုဆရာဝန်တို့ ပူးပေါင်းကာ အနီးကပ် စောင့်ရှောက်ဆောင်ရွက်သဖြင့် အစာအိမ်နှင့် အူလမ်းကြောင်းအတွင်း ရောဂါအခြေအနေကို တိကျစွာ မြင်တွေ့နိုင်ပြီး ထိရောက်စွာ ကုသပေးနိုင်ပါသည်။
Q: ကလေးက အစားနည်းပြီး ကိုယ်အလေးချိန်မတက်ရင် ဘာတွေစစ်ဆေးသင့်သလဲ?
A: သင့်တော်သော ကုသမှုအစီအစဉ်များ ချမှတ်နိုင်ရန်အတွက် ဆရာဝန်က ကြီးထွားဖွံ့ဖြိုးမှု၊ အာဟာရစုပ်ယူမှုအခြေအနေ၊ အစာခြေစနစ်ရောဂါများနှင့် အခြားဖြစ်နိုင်သော ရောဂါများကို စစ်ဆေးအကဲဖြတ်ပေးပါမည်။
